Era Bibliotèca deth Conselh de Garanties Estatutàries ei ua des principaus bibliotèques deth nòste país en encastre deth dret public. Eth sòn ample hons bibliografic e documentau especializat en matèria juridica, damb mès de trenta mil volums e mès de tres centes publicacions periodiques, a coma fin principau era de sostier ara mès nauta institucion consultativa dera Generalitat, ath madeish temps que tanben opère coma un centre de referéncia entà investigadors, academics e professionaus deth mon deth dret. En aguest sens, maugrat qu'eth sòn hons compren referéncies de totes es branques deth dret, destaquen es relatives ar encastre deth dret constitucionau (formes d’Estat e de govèrn, Estat autonomic, dret public catalan, drets fondamentaus e libertats publiques, e tribunaus constitucionaus, entre d’auti); dret administratiu (administracions estataus, autonomica e locau, foncion publica, miei ambient, organizacion deth territòri e urbanisme, entre d’auti); dret dera Union Europèa (institucions, libertats comunitàries e politiques sectoriaus, entre d’auti); dret financèr e tributari e dret civiu de Catalonha. 

Era creacion dera bibliotèca a era sua origina ena constitucion deth Conselh Consultatiu dera Generalitat (1981-2009) e ena actualitat aucupe ua superfícia totau de 250 mètres quarradi, damb 1.450 mètres lineaus de mòble e 44 punts de lectura. Plaçada ena planta baisha deth Palau Centelles, darrèr deth pati d’armes, ei formada per dues sales de lectura e dus depausi de compactes. Tot eth hons documentau ei de liure accès e se pòt consultar a trauès deth catalòg automatizat der OPAC (on-line public access catalog). Atau madeish, des des sales de lectura tanben se pòt accedir a nombroses bases de donades de normativa, doctrina e jurisprudéncia en format electronic.